الذوق

الهم في قلبي له جذوع وعروق
ويغرس خياله لا يحاتي حياتي

تعبت اطالع طيفك بحب من فوق
ودي م حاتي بس قلبي يحاتي

ياللي سكبت الذوق في داخلي ذوق
وارويت  شريان  المحبه  غلاتي

منسوب .. حبك حسه يفوق ويفوق
وفاقت مشاعر فيها تمويل ذاتي

والله يستر ..  بس لا يكسر الطوق
استغفر الله ادعي دوم ف صلاتي

لان الرزق م الرب .. والعبد مرزوق
وقادر يحققها .... ويبلغ مناتي

وجتني احاسيس الوله كنها بروق
تلضي عليه .... واتعايا جهاتي

افتح لباب ن بالهجر حيل مغلوق ؟!
كافي ...  معاناة العشق يا غناتي

لو كانت الاحجار تنطق لمخلوق
كان انطقت من كثر ماهي تحاتي

خليفه الصائغ 24 / 6  /2015

الي من يهمه الشعر

" الى من يهمه الشعر "

الراس منزل يرحب القاف ضيفه
ياتي بكيفه دون داعي وترتيب

قهويت ابيات الحبيب وليفه
وصبيت م دلالي علوم  وتراحيب

ياللي رسموني بالمعاني اللطيفه
قل كيف الاقيهم على صفحة الويب

وانا الفقير ... اللي بجيبه رغيفه
يبكيه احساسي من بعيد وقريب

متلحفن حلمه .. ونومه  رصيفه
واتريق الذكرى بلا شك او ريب

الشعر يثمر ف القلوب الرهيفه
لانه رساله طيب من عاشق الطيب

ياهل العقول الواعيه والنظيفه
القلب متعب م البنا والتصاويب

ماصرت اميز بين قيضه.. خريفه
لكن اميز بين بالطيب والطيب

شاعر ويكتب جزل احساس كيفه ؟!
ولانته من ارحامه ولانته له حبيب

سيرت احاسيسك . بنظره كفيفه
وكانت احاسيسك .. تجيبك بترتيب

(الشيفه شيفه والمعاني ضعيفه )
وياللي حضوره يشبه غيابه يغيب

خليفه الصائغ  15 / 6 / 2015