مسباح الجمر

الى علي الراسبي ؛

سلام " مسباح الجمر " القف الطير
من طار الى عين الصباح و" خبشها "

يسحب لك العزه حروف وتصاوير
ويشبع حليلتها .... ويروي عطشها

ما جيت اجر القاف من دون تفكير
مجنون من جرها بعد ما خدشها

هات الشعر وازهر ورود ونواوير
اما حياة الطيب ... بالطيب عشها

خل القصيد الذرب في دربك ينير
في محفل الاشعار قدم قرشها

لا جاتك الفكره .. قوافي طوابير
تصقل معانيها ... تعلي عرشها

جايب قصيده غير احساسها غير
إن ما تجي مثل الذهب ما ارشها

وإن  ما تهز احساس كل المناعير
ابرك اخليها ...... واجهز نعشها

من بعدها تصبح وتمسي على خير
جيت بقوافي شوف دقة نقشها

#خليفه_الصائغ 2015

* مسباح الجمر :  اسم ديوان الشاعر علي الراسبي

قناع الحب

من فاح راس الشعر جات الغنيمه
ما جاتني الا من " مصارخ " الجان

قيفان تلضي م القهر والظليمه
في ظهرها تلقى من الاخ دمان

بسم الذي اسكب على الارض ديمه
تروي بساط الارض والكل رويان

تتقاذف فجوفي مشاعر حميمه
قل كيف بركان ن يطفيه بركان

وقت العزم ارقى فراس العزيمه
وإن ما اكون الراس ما كون سكان

ضاري على بحر (ن) تعالا زميمه
تتلاطم امواجه .. وانا فيه ربان

ما ترخص ف عيني دموع اليتيمه
إذ الامر اصبح مع البعض سيان

بعض الجروح ... تكون جدا اليمه
من عمقها تشعر بلوعه وغثيان

ما تندمل ... لان  الكريمه كريمه
حياتها عزه ... ولو بان ما بان

صارت " قلوب الحب " من دون قيمه
تركض عليها وحوش وتعضها اسنان

لعبة " قناع الحب " .. لعبه قديمه
قناعها يسقط ولو كان ما كان

كم نذل ما يعرف معاني الحشيمه
ينهش من ظهور الكرامه بنيبان

يركز نصأله ما يحاتي الوخيمه
ﻻ يحاتي الحرمه ولا يحاتي انسان

خليفه الصائغ 2015

صلاله

#صلاله

ياشيخ لك وسط الحشا منزل (ن) غير
تحت الثرى بيتك مقيم #بصلاله

ذكراك في قلبي له كثير تاثير
وكلما أوصله ...  أتذكر قباله

جيت بسلام الخير يا دار اهل خير
بعداد زوار الخريف .... وجماله

شفت المشاعر كل ابوها طوابير
حد (ن) بخلانه وحد (ن) لحاله

وعرفت بان الشوق عزم لك يطير
وقمت اتوصى به واضرب دباله

يسكب قوافيه على قافيه " ير "
فالصدر اما العجر ياتي ب " اله "

لذا سبكت القاف من دون تاخير
ألحق على قاف ن تجيب الجزاله

وجنيت شعرن يرقى للغيم والطير
فارد جناحه في ضواحي صلاله

دار (ن) لها فالعز حب (ن) وتقدير
والقلب يتمنى يعمق ... وصاله

فيها مشاعر غير .... أجواها غير
تبغى الاصاله في صلاله اصاله

#خليفه_الصائغ 21/8/2015

يروح ويعود

معروف عالمنا ترى يروح ويعود
واشعارنا  مرن  عليه وغونه

لو نأخذ العبره من صحاب لاخدود
الحق يبقى حق ويبان سنه

ابداعك اللي عمره ما حده حدود
من مستحيل يموت ويموت فنه

ذا  الفن اصلا  ماله  قياس  وقيود
والشعر يبقى والاحاسيس منه

ابشرك لن شفت من صوبي ركود
لا تعشم ابليسك على ما تظنه

هذي يميني شوفها ظل  ممدود
ومن كثرة الخيرات بتشوف جنه

ارحب على ارضي هنا سدر مخضود
باظلك بظلي .... بلا اي منه

وارحب على ارضي هنا بلح منضود
كم كلت منه .. وكم تقهويت بنه

احساسي اللي يروي الذوق موجود
لا راح هو عني ..... ولا رحت عنه

الجود بالموجود .... يا راعي الجود
ياللي معاه الجود فرض ن وسنه

باقول قولن مثل " بن وهقه حمود "
( يا معتدي .. سيف الخشب لا تسنه )

من سن سيف ضد لاصحاب منقود
غيم الحسد غطن عيونه ، عمنه

وما هو وراء قتل الامل اي مردود
من  يقتل  الآمال  متقول  كنه

هالقلب صافي داخله فعل محمود
ومن هو يسوء الظن قد خاب ظنه

معروف عالمنا ترى يروح ويعود
ويبقى ذكر إبداع أيدي نقشنه

خليفه الصائغ 2015