بيرق العز
خير الشعر لما على موطني مال
ورقت حليله وازهرت لي حليله
وتكثف الاحساس والقاف همال
وكم ذل من درب الكرامه احيله
رجل ن جعل في محزم العز اكيال
كم ينتخي لك قبل ما تنتخي له
والطيب له منزال والجود منزال
الاثنين في عرف المكارم فضيله
يلي يطيب القلب ويريح البال
مكارم اخلاق الحروف الجزيله
واخلاقك العطره لها طيب الفال
وبذر الفضيله ما يورق رذيله
ومن يتبع اهل النم فالقيل والقال
ف نهاية المشوار هيش الحصيله !
خلك رجل نايف على مجالس رجال
وجود وكرامه تنعدم في مثيله
خير اللحايا ان جات مع عز وقبال
وتصدرت بالطيب صدر القبيله
ترسم عليها بيرق العز ف جبال
النايفه باخلاق لوحه جميله
والصاحب اللي صحبته توزن اموال
حافظ عليه ولا تتدور ... بديله
لي حاتمي الطبع يبقى له اطلال
في شرفة التاريخ ليل ومجيله
لي عطر القرطاس بالعود ما زال
عطره على عنق الحروف الاصيله
لن الوفاء عقد ن على صدر سلسال
والصدق احساس النفوس النبيله
لـ نسان بيت ن هيكله خلق وخصال
شامخ باخلاق .. ومكارم .. جليله
#خليفه_الصايغ
