البذره الموؤوده

يا مرحبا .. بالبذره الموؤوده
لي عذبت وايد قفاها فوده

لما غرست فارض المشاعر ثمرت
قصيدة ن تحمل صفه محموده

لن جيت اعدها ركزو في عدها
يمكن نلاقي الحلقه المفقوده

فتره وراحت من عقبها فتره
كانت تباع وتوأد ومضهوده

ثم عزها الاسلام ، ثم كرمها
من عقب ما كانت هبه منجوده

رميت خيط ن من خيوط الفكره
واخيط به شعري بأعلى جوده

البنت دانه .. والصدف والدها
يحميها من جيش الدهر وجنوده

ومن يرزق بأنثى ابد .. لا يحزن
يفرح .. ويبعد نظرته المحدوده

العمر فاني .. والجسد يتواهن
وكلن بيجني ثمرته ومحصوده

من قبل غزو الشيب فكر وايد
الفرصه عندك بعدها موجوده

احسن عليها تشم  .. ريح الجنه
يوم المشيب يبان لك منضوده

ثقفها باخلاق العزيزه الحره
وخليها باخلاق العرب مسنوده

#خليفه_الصائغ

كنا حبايب

للحب خمره صب لي منه " كوبين "
بسكر واكون فواقع الحب ظافر

والشوق لك موج ن ومرفأه لك عين
ولما اجي مرفاك اهيم واسافر

كم في ضفاف الوجد آهات  ، وتبين !
اعظم جيوش الحب كلها اتضافر

كنت انتظر غيم العشق ، والمحبين
ف ثنينهم ما كان لي حظ وافر

كنا حبايب .. ونتزاعل ... وبعدين ؛
صرنا مثل موجب وموجب تنافر

كنت اعترف بإني عشقتك ، تقولين ؛
الجوع كافر او ترى العشق كافر

ما هو مهم أصلا علامك تسألين !
الاسئله خيط (ن) تكشفك لقافر

من كثر ما كنت اعترف لك الى الحين
حتى التعب فيني من الوجد " طافر "

وكنتي تحسبين القصائد تظنين
باني من احساس المحبين نافر  !

بس ﻻ تحاتي هين كنتي تحاااتين
ايام ... وآهات الحناجر .. تزافر

بكره نموت .. نصير ذكرى وغالين
وحتى القصائد جات حافر ف حافر

واكتب قصائد دون معرف على وين !
حتى انذكر اسمي فجميع المخافر

في داخلى طعنات ، صرخات وزفين
ويتصالح ن صلح " الهناه وغوافر "

من بعدها كلنا ترى بخير ، طيبين
نرسي ف أمان عمان والكل ظافر

#خليفه_الصائغ 2015

زين الوصايف

قالت ؛ تعال الحين حبك بدأ .. يزين 😢
ما كان زاين رغم .. حسن الوصايف !

بنت ن حلاها يقسم القلب نصفين 💔
ويتعطلن ..  منها .. جميع الوظايف

ولا تبسمت بانت على خدودها عين
تضحك ، وتغمز لي عيون الولايف

مشتاق شوق ن للملامح ، والاثنين ؛
شهد الشفايف .. والخدود القطايف

كنت استضيف الحلم من اجلها سنين
ثم جات افكار وشعوري " رضايف "

وأيقنت باني في ... عيون المحبين
ساكن وسوى الشوق فيها "ودايف "😧

وقالت ؛ علام الزين ما يعشق الزين 😦
وجاوبت ؛ قلبي من هوى الزين عايف

فقالت ؛ نعم ! بس كيف كنا حبيبين ؟
وجاوبت ؛ مزحه ما عليها حسايف 😅

خلينا نبدا الحين ، نقطف من التين
نعمه مدام الحين ما حد شايف 👀

طلعت وقالت لي حبيبي ، وبعدين !
لو صار قلبك داخل القلب .. نايف

وجاوبت رغبة قلب مدري الى وين ؟!
ولا انا في داخلي حيييييل خايف 😨

زرعت بذرة حب ما بين 💕 قلبين 💕
عساها تثمر طيب .. ما وجه زايف

#خليفه_الصائغ 2015

الراحله

إن ما يهز الشعر احساس الخليل
بخصف له احساسه وبزرع ساحله

 
والعطف ياللي مربط برد الجميل 
ما تقبله نفسي ... ولا ترتاح له 

مع كل هبة ريح اغصانك تميل 
وتطيح اوراقك فارض (ن) قاحله

 
باب الشعر مفتوح احساسه يسيل 
والبيت تذكرته ... ووزنه راحله

والشعر يأتي من قبل حل المجيل
بأسمن ابياته .... إذا جت ناحله

ولو كان رحلة ميل او الفين ميل
ما اثرت ما دام إنها ..... راحله

لا ننظر لوزن الجميل او اي بديل 
ما دامت ابار المشاعر ... ضاحله 

ومن بعد ما جيت اتهيا .. للرحيل 
راحت واحلامي معا " فالراحله " 

العاطفه ، والعاصفه ، عابر سبيل 
ضيفان وابداع القصيد ارباح له

#خليفه_الصائغ

الشيخ فزاع

شيخ الشباب

شديت   عيصان  القصيده  بالابداع
واحساس  دهن العود منها ، اشمه

وشديت  محزم  جود  غالي ولماع
ما   يرحم   رصاصه  اذا حر زمه

جبت  القصيده  من  جزاله  لها  باع
وزملتها شعر ( ن ) يخاف  المذمه

من هو نظر للقاع يهوي الى القاع
لا ينتظر في يوووووم مطلاع قمه

خل المثل في عينك (الشيخ فزااع)
وحاوول تعيد ف كل مره المهمه

لان الحياه انساب ، اشكال ، انواع
واشياء وايد بس تحتاااااااااااج ذمه

دام الامل مجداف وعزومك شراع
امشي ف درب المجد فزاع ضمه

يمكن يجيك تكون للجوووووع شباع
وتجيك همه فوووووق همه وهمه

للبيت اضلاع ( ن ) ،،وللمجد اضلاع
واااااااااضلاع مجدك كلها مستممه

والرجل في ارقى المهمات سطاااع
يوم   الكرامه  ميته   ومدلهمه

لذا نقووول الشعر في كل مذياااع
(شيخ الشبااااب) العز بيديه لمه

ان كنت للقمه تبي دوووووم مطلاع
خلك على شيخ ( ن ) كل المجد تمه

ان قالها تمت ترى تمت الساااااااااع
ما ترجع الكلمااااااااات م حدود فمه

ودي اعد  ابيات في  شيخ له باع
بيت الفقر والجووووع بيديه " دمه "

من هو نظر للقاع يهوي الى القاع
لا ينتظر في يوووووم مطلاع قمه

خل المثل في عينك (الشيخ فزااع)
وحاوول تعيد ف كل مره المهمه

#خليفه_الصائغ 2015

عماني وافتخر

ما هوجست بس هوجست اشعاري
وقدحت ناموس الخيال بنااااااااري

جينا بمحاااااااااازم من ذخيره حيه
وسط المعاااااارك سيفنا بتااااري

ولنا ف اعراف المكاااااااااارم فيه
ما تنقصي في ليل وﻻ نهاااااااري

حنا حل الضيفاااان " حاتم طائي "
ننحر سماااااااااان البل واﻻبكاري

حن ﻻبتن وقت الواااااااااازم فزعه
واكبر دليللي " ازمة اﻻعصاري "

دمي" عماني وافتخر " باعماااني
سيف ن صقيل ن يقطع المسماري

بنفسي بعيده واعتمد له قووووله
ويصح لسان الشعر والشعاااااري

(البحر نشرب والصخر ماكووله)
فطنة زعيم الشعر والافكاااااري

( والضبع نمهل والاسد مشوايه )
هو جاب من جزل القصيد بكاااري

في ساحه اﻻشعاااار نشعل شعله
ما ينطفي الابداع فيها اجبااااااري

ولبست في خصري حزام ن ناسف
ودي انفجر في زحمة الاشعااااري

حتى    لو   قالوا  الفكر ارهاابي
بقدح كل ابداع الخيال بنااااااااري

خليفه الصائغ
25 / 1 / 2014

عمان العز

عمان العز

صباحكم شعـر حضر والطيب نفحاته عبير
مع كل قيفان الحرف اللي يزاحمها الهبوب

قصيدةٍ حبلا شعر .. سحابها ودق وخرير
دعيتها لبت طلب ثم جاتني من كل صوب 

اتزاحمي حولي تعالي استمطري طش كثير
واروي قياعين الارض مع كل من فيها يجوب 

وتزاحمت كل البراءة في منطق الطفل الصغير 
وتزاحمت نظرة  أمل في عيون طيبين القلوب 

 
تزاحمت مثل البشر في موسم الحج الكبير
وتزاحمت مثل الرمي من زم جالود الحروب 

ثم سربلت جند الشعر فالمحزم الغالي يصير
مخباط قيفان وفكر احساس عن قلبي ينوب

 
حفله مشاعر داخلي،ارقى الى العليا واطير
وافرد بجنحان الفخر في كل قمه لي دروب 

واللي انطوى صفحة جهل والدرب للعليا يسير
حن من سنة سبعين نبني مجدنا والحب طوب

 
من دمنا نروي الارض لأجل تثمر حب / خير
ثم أثمرت عزه،كرامه بريحة امجاد وطيوب

ونصير لأجل عمان سيلا ً ما يوقف له صدير
نزهر على جبال الحجر ونعم م شمال وجنوب

سجدة شكر ف ترابها بتشم ريحة أم/غير
افضالها لكل البشر كم فكة آهات وكروب

 
تاريخها الناصع بياض الممتلي عزه يشير 
لانها متفرده عن غيرها والعز ثوب

لانها وقت الحرب حمرا وريتها تدير
ام المعارك ما تهاب شبانها سند وعُصُوب 

 
ولانها متكشخه في ثوب اخضر كالحرير
فيدينها اليمنى سلام والثانيه فتنه تذوب

 
وكم في عمان العز مأوى للفقير المستجير
نادت سقطرى من قبل وعمان لبتها تثوب

من حكم قابوس المعظم كل شعبه يستنير
توقف له ابيات القصيد تنصاه حكام وشعوب

 
مولاي ياروح الوطن يارمزه الوافي المنير
عماننا بك تفتخر وبحنكتك تنبض قلوب

#خليفه_الصائغ

 

غرد البندق

غرد البندق

لابتــي عـانـي الى داره
والمشـاعر تأتي " رباعه "

غــرد البنـدق بـ " هيزاره "
والاوادم أذن سمـــاعه

لو يثيب الجار الى جاره
ما بقت هـ الناس  " مرتاعه "

قلبنا يبعــث لك ازهـاره
زاهره ارضه بأوجاعه

والحرف ينزف باحباره
عالن اخضاعي اخضاعه

والدمع لن طاح فـ حجاره
كسر المعـنى وثم باعه

عود قلبي يعـزف اوتاره
صافح الاحــزان بوداعه

 
خليفه الصايغ 15 / 11 / 2015

 

الشعر احساسه شبيه الكلاشن

ما دام اركان القصايد ..  تواشن
ملزوم راس الفكر يشكي من صداع

عامين ، ابيات وقوافي ..   تحاشن
عن مرتع صدورن لها الشوق مرباع

في داخل العشاق .. جالن وعاشن
متاقلمه كلها على حسب الاوضاع

والشعر احساسه شبيه " الكلاشن "
اضغط عليه ، رصاص يطلع لك رباع

وان شفتهن وسط الجماهير فاشن
فجر من احساسه فلاشات وإبداع 

وثم عطر القاعه بازكى .. الواشن
يمكن عصافير ن من الصوت ترتاع

وإن صار وقلوب العصافير جاشن
غنيمت ن جاتني ويا مرحب الساع

ياكم حروف ن قبل هاشن وماشن
اما على المسرح .. واما ف مذياع

والقلب بيت ن ام لاحساس راشن
قلب ن بدون احساس بيخلف جياع

#خليفه_الصائغ 30/10/2015