عمان العز
صباحكم شعـر حضر والطيب نفحاته عبير
مع كل قيفان الحرف اللي يزاحمها الهبوب
قصيدةٍ حبلا شعر .. سحابها ودق وخرير
دعيتها لبت طلب ثم جاتني من كل صوب
اتزاحمي حولي تعالي استمطري طش كثير
واروي قياعين الارض مع كل من فيها يجوب
وتزاحمت كل البراءة في منطق الطفل الصغير
وتزاحمت نظرة أمل في عيون طيبين القلوب
تزاحمت مثل البشر في موسم الحج الكبير
وتزاحمت مثل الرمي من زم جالود الحروب
ثم سربلت جند الشعر فالمحزم الغالي يصير
مخباط قيفان وفكر احساس عن قلبي ينوب
حفله مشاعر داخلي،ارقى الى العليا واطير
وافرد بجنحان الفخر في كل قمه لي دروب
واللي انطوى صفحة جهل والدرب للعليا يسير
حن من سنة سبعين نبني مجدنا والحب طوب
من دمنا نروي الارض لأجل تثمر حب / خير
ثم أثمرت عزه،كرامه بريحة امجاد وطيوب
ونصير لأجل عمان سيلا ً ما يوقف له صدير
نزهر على جبال الحجر ونعم م شمال وجنوب
سجدة شكر ف ترابها بتشم ريحة أم/غير
افضالها لكل البشر كم فكة آهات وكروب
تاريخها الناصع بياض الممتلي عزه يشير
لانها متفرده عن غيرها والعز ثوب
لانها وقت الحرب حمرا وريتها تدير
ام المعارك ما تهاب شبانها سند وعُصُوب
ولانها متكشخه في ثوب اخضر كالحرير
فيدينها اليمنى سلام والثانيه فتنه تذوب
وكم في عمان العز مأوى للفقير المستجير
نادت سقطرى من قبل وعمان لبتها تثوب
من حكم قابوس المعظم كل شعبه يستنير
توقف له ابيات القصيد تنصاه حكام وشعوب
مولاي ياروح الوطن يارمزه الوافي المنير
عماننا بك تفتخر وبحنكتك تنبض قلوب
#خليفه_الصائغ
ليست هناك تعليقات:
إرسال تعليق