سلام الخير
سلام الخير يا داري من الناموس الى الناموس
سلام العاشق المخلص ،سلام ن تصقل حروفه
سلام ن اكتبه بدمي من اول قوس لأخر قوس
سلام ن ينبري عالي شمــوخ يقبل كتـوفه
اريد أبعد عن العالم ، أفلت مربط الهاجوس
واسرج خيل افكـاري بعد ما جات مرضوفه
تفوح دلال اعماقي .. ويطلع هيلها المحبوس
تعم ظلالك عماني ويبرى الجرح من شوفه
وارتب لك قفص صدري وانقش داخله (قابوس)
لأن بأحرفه تبقى حـروف الشعر مشغوفه
ويبقى هالوطن غالي وحن لأجله وقفنا تروس
ونغمد سيف حسادك وحنا بالوفاء سيوفه
ونأخذ من ترابه خير ونروي هالتراب نفوس
وينبت خير فترابه ،،،،، لان الخير من جوفه
وطن من تربته نولد شباب ن رافعين الرؤوس
شباب المجد فالأوطان ، ريحه طيب مردوفه
واذا هبت ذواريها تجاوبها ذواري الكوووس
تنحي من درب مــوتك هناك رجال معـروفه
فقط لا من طرى اسمك احس فداخلي مغروس
شجـر بإحسـاسي الطاهر بيد ابـوي مذروفه
يجـف الحبر من يدي واعجر افتــح القاموس
بعــد ما كنت اتفــنن وعندي الشعر خـروفه
تجي (إلياذة افكاري) مثل ما جاب هـوميروس
اوضح ملحمة حبي لإجل ( عمان ) موصوفه
سلام الخير ياداري من الناموس الى الناموس
سلام ن ينبري عالي شمــوخ يقبل كتـوفه
خليفه الصائغ
ليست هناك تعليقات:
إرسال تعليق